گوانتانامو جیل بند نہیں ہوگی، امریکی حکومت
امریکی حکومت نے کہا ہے گوانتانامو جیل بند نہیں کی جائے گی۔
امریکی وزیرقانون جیف سشنز نے گوانتاناموجیل کو باقی رکھنے کا اعلان کرتے ہوئے کہا ہے کہ ایسی کوئی قانونی ممانعت نہیں ہے کہ نئے مشتبہ دہشت گردوں کو گوانتاناموجیل نہ بھیجا جائے۔
امریکی وزیرقانون نے کہا کہ گوانتانامو جیل کو کھولے رکھنے کا اختیار اور فیصلہ امریکی فوج کے ہاتھ میں ہے۔
ان کا کہنا تھا کہ حکومت نے گوانتاناموجیل کو باقی رکھنے کے لئے اس میں جدید ترین آلات اور وسائل نصب کئےہیں۔
وائٹ ہاؤس کے ترجمان شون اسپائیسر نے بھی کہا ہے کہ ٹرمپ انتظامیہ گوانتانامو جیل کو باقی رکھنے میں پرعزم ہے اور وہ سمجھتی ہے کہ جن لوگوں کو اس جیل میں رکھا جارہا ہے اس کے لئے کوئی نہ کوئی دلیل ہے۔
امریکی انتظامیہ نے گوانتانامو جیل کو باقی رکھنے کا یہ اعلان ایک ایسے وقت کیا ہے جب اس بدنام زمانہ جیل میں قیدیوں کو طرح طرح کی ایذائیں دیئے جانے کی بے شمار رپورٹیں موصول ہوئی ہیں۔
سابق امریکی صدر باراک اوباما نے بھی اس بدنام زمانہ جیل کو بند کرنے کا وعدہ کیا تھا لیکن انہوں نے بھی اپنے وعدے پر عمل نہیں کیا۔
