میانمار میں کشتی تباہ 20 افراد جاں بحق
جنوب مغربی میانمار میں ایک کشتی کارگو جہاز کے ساتھ ٹکرانے سے تباہ ہو گئی جس کے نتیجے میں کم از کم 20 افراد ڈوب کرجاں بحق اور ایک درجن کے قریب لا پتہ ہو گئے۔
میانمار کے سرکاری میڈیا کے مطابق 60 کے قریب افراد کشتی میں سوار تھے۔ حکام کے مطابق واقعہ میں 20 افراد جاں بحق ہوئے جب کہ 27 افراد کو بچا لیا گیا، ایک درجن کے قریب تاحال لاپتہ ہیں جن کی تلاش جاری ہے۔ حادثے میں جاں بحق اور زخمی ہونے والوں میں بڑی تعداد خواتین اور بچوں کی ہے۔ جبکہ پولیس کا کہنا ہے کہ حادثہ نگاون دریا میں پیش آیا اوراب تک 27 افراد کو بچا لیا گیا ہے۔
واضح رہے کہ میانمار میں سمندری حادثات معمول کی بات ہے کیونکہ وہاں کے عوام کشتی کے ذریعے نقل و حمل پر زیادہ انحصار کرتے ہیں۔ گزشتہ برس اکتوبر میں بھی ایک کشتی کے حادثے میں 73 افراد ہلاک ہوئے تھے جب کہ مارچ 2015 میں بھی اسی قسم کے ایک حادثے میں 64 افراد جاں سے ہاتھ دھو بیٹھے تھے۔
