سری لنکا میں مسلم مخالف فسادات کے بعد سوشل میڈیا پر پابندی
Mar ۰۸, ۲۰۱۸ ۰۸:۲۸ Asia/Tehran
سری لنکا میں مسلم مخالف فسادات کے بعد ملک بھر میں سوشل میڈیا پرپابندی عائد کردی گئی۔
غیر ملکی خبر رساں ایجنسی کے مطابق کشیدہ حالات کے سبب سری لنکا کی حکومت نے ملک بھر میں سوشل میڈیا پر عارضی پابندی عائد کردی ہے۔ ٹیلی کام اتھارٹی اینڈ کمیونی کیشن نے ملک بھر میں تین دن کےلیے فیس بک، وائبر اور واٹس اپ کو بلاک کردیا ہے جبکہ حکومت نے سوشل میڈیا پرعارضی پابندی کی وجہ مسلمانوں پر ہونے والے حملوں کی خبروں کو روکنا بتایا ہے۔
واضح رہے کہ سری لنکا کے طول و عرض میں مسلمانوں پر بدھ بھکشوؤں کے حملوں کے بعد متعدد علاقوں میں حالات تاحال کشیدہ ہیں، بدھ مت کے پیروکاروں نے مسلم مخالف کارروائیاں کرتے ہوئے مسلمانوں کو بھاری جانی و مالی نقصان پہنچایا ہے جبکہ حکومت نے فسادات میں کئی ہلاکتوں کے بعد ملک بھر میں ایمرجنسی نافذ کر دی ہے۔
