کروڑوں انسان بھوک اور کم خوراکی کا شکار
دنیا بھر میں 82 کروڑ انسان بھوک اور کم خوراکی کا شکار ہیں۔
تازہ عالمی اشاریے کے مطابق گزشتہ دو برس کے دوران بین الاقوامی مسلح تنازعات اور جنگوں کی وجہ سے اس تعداد میں اضافہ ہوا ہے اوراس وقت عالمی سطح پر 82 کروڑ انسان بھوک اور کم خوراکی کا شکار ہیں۔
جرمن میڈیا نے عالمی سطح پر فاقہ کشی، بھوک اور کم خوراکی سے متعلق اعداد و شمار پر مبنی انڈیکس کے حوالے سے کہا ہے کہ اس وقت کرہ ارض پر 82 کروڑ انسانوں کو زندہ رہنے کے لیے یا تو کوئی خوراک دستیاب نہیں یا پھر وہ تشویش ناک حد تک کم خوراکی کا شکار ہیں۔ ان میں وہ قریب ساڑھے 12 کروڑ انسان بھی شامل ہیں، جن کی بھوک کا مسئلہ انتہائی شدید ہو کر فاقہ کشی بن چکا ہے۔
رپورٹ کے مطابق 2000ء سے اب تک بھوک کے خاتمے کی عالمی کوششوں کو اُن جنگوں اور مسلح تنازعات سے شدید خطرات لاحق ہیں، جو مختلف خطوں میں جاری ہیں۔
اس انڈیکس کے مطابق اس وقت دنیا کا بھوک اور کم خوراکی سے سب سے زیادہ متاثرہ خطہ براعظم افریقہ کا زیریں صحارا کا علاقہ ہے۔
