SAHAR

ہندوستان میں کورونا وائرس کے خلاف ملک گیر مہم کے تحت اتوار کو ملک گیر عوامی کرفیو کا اعلان کر دیا گیا ہے ۔ سبھی سیاستدانوں اور رہنماؤں نے عوام سے اس کرفیو میں ساتھ دینے کی اپیل کی ہے ۔

اسی کے ساتھ ہندوستان کی وزارت صحت نے ہفتے کی صبح اعلان کیا ہے کہ ملک بھر میں دو سو اٹھاون افراد کے کورونا وائرس میں مبتلا ہونے کی تصدیق ہو چکی ہے۔ اس رپورٹ کے مطابق ہندوستان میں کووڈ نائینٹین میں مبتلا افراد میں سے دو سو انیس ہندوستانی اور انتالیس غیر ملکی شہری ہیں اور اب تک چار افراد کی موت ہوچکی ہے جبکہ تیئیس افراد صحتیاب بھی ہوئے ہیں۔

ہندوستان میں کورونا سے متاثرین کی سب سے زیادہ تعداد ریاست مہاراشٹرا میں ہے ۔ مہاراشٹرا میں اس وائرس کے مریضوں کی تعداد انچاس ہے ۔ اس کے بعد ریاست کیرلا میں تینتس، دہلی میں پچیس، یوپی میں تیئیس کرناٹک اور راجستھان میں پندرہ پندرہ، لداخ میں تیرہ ، تلنگانہ میں آٹھ، جموں و کشمیر میں چار ہریانہ اور تمل ناڈو میں تین تین اور چند دیگر ریاستوں میں ایک یا دو کورونا مریضوں کا اندراج کیا گیا ہے۔