SAHAR

قائد انقلاب اسلامی نے زور دیکر کہا کہ کسی بھی صورت میں امریکا کے تعلق سے اسلامی جمہوری نظام اور ملت ایران کی پالیسی ذرہ برابر بھی تبدیل نہیں ہوگی۔ آپ نے فرمایا: "ہم دو طرفہ، علاقائی اور عالمی مسائل کے بارے میں امریکا سے کسی طرح کے بھی مذاکرات نہیں کریں گے، سوائے ایٹمی مسئلے جیسے کچھ مستثنی مسائل کے کہ جن کے بارے میں اس سے پہلے بھی گفتگو ہو چکی ہے۔" 

قائد انقلاب اسلامی نے طفل کش، دہشت گرد صیہونی حکومت کی حمایت اور حزب اللہ لبنان کے ایثار پیشہ مجاہدین کو دہشت گرد کہنے کی امریکی پالیسی کی شدید مذمت کرتے ہوئے فرمایا: "علاقے میں ہماری اور امریکا کی پالیسیوں میں ایک سو اسی درجے کا فرق ہے، تو پھر اس سے کیسے مذاکرات ہو سکتے ہیں؟!
قائد انقلاب اسلامی نے ایٹمی موضوع پر اپنی گفتگو جاری رکھتے ہوئے حالیہ کچھ دنوں کے دوران کی امریکی حکام کی رجز خوانی کا حوالہ دیا اور فرمایا کہ امریکی حکام ان دنوں داخلی مشکلات کو حل کرنے کے مقصد سے رجز خوانی کرنے پر مجبور ہیں، جبکہ ان فضول بیانوں کا حقیقت سے کوئی تعلق نہیں ہے۔
قائد انقلاب اسلامی نے امریکی حکام کی اس رجز خوانی کا حوالہ دیا کہ "ہم نے ایران میں ایٹم بم کا راستہ مسدود کر دیا۔" قائد انقلاب اسلامی نے فرمایا کہ ہم نے برسوں قبل اسلامی اصولوں کی بنیاد پر جوہری ہتھیار بنانے کی حرمت کا فتوی دیا اور ایٹمی ہتھیار کی ساخت میں ہمارے سامنے شرعی رکاوٹ ہے، لیکن امریکی حکام بعض اوقات اس فتوے کا ذکر کرنے کے باوجود اپنے پروپیگنڈوں اور رجز خوانی میں دروغگوئی کر رہے ہیں اور دعوا کرتے ہیں کہ ان کی دھمکیوں سے ایران میں نیوکلیائی بم بنانے کا راستہ مسدود ہو گیا۔ قائد انقلاب اسلامی نے فرمایا: "موجودہ امریکی حکام ملت ایران کے گھٹنے ٹیک دینے کی باتیں کر رہے ہیں، البتہ پانچ سابق امریکی صدور بھی اسلامی انقلاب کی فتح کے بعد یہی آرزو دل میں رکھتے تھے، لیکن یا تو وہ مر گئے یا تاریخ میں گم ہوکر رہ گئے، انھیں کی طرح آپ بھی ایران کو جھکانے کا بس خواب دیکھتے رہئے!"
قائد انقلاب اسلامی آیت اللہ العظمی خامنہ ای نے ایران کے سلسلے میں 19 اگست 1953 کی بغاوت اور صدام کی حمایت سمیت ماضی میں امریکا کی متعدد غلطیوں کے موجودہ امریکی صدر کے اعتراف کا حوالہ دیا اور کہا کہ یہ 'مشتی از خروارے' کی مانند ہے، کیونکہ اس کے علاوہ بھی امریکیوں کی بہت سی غلطیاں ہیں جنھیں وہ قبول کرنے پر تیار نہیں ہیں۔
قائد انقلاب اسلامی نے امریکی حکام کو نصیحت کی کہ موجودہ غلطیوں سے باز آئیں تا کہ اس ملک کے آئندہ حکام ان کی موجودہ غلطیوں کا اعتراف کرنے پر مجبور نہ ہوں۔
قائد انقلاب اسلامی نے اسلامی جمہوریہ ایران کی روز افزوں قوت کا حوالہ دیتے ہوئے فرمایا کہ تقریبا بارہ سال سے دنیا کی چھے بڑی طاقتیں ایران کو ایٹمی صنعت کے میدان میں کام کرنے سے روکنا چاہ رہی ہیں اور جیسا کہ بعض نے کہا بھی ہے کہ وہ ایران کی ایٹمی صنعت کا ہر 'اسکرو' الگ کر دینا چاہتی ہیں لیکن آج وہی طاقتیں ایران میں کئی ہزار سنٹری فیوج مشینیں اور ریسرچ کے عمل کا تسلسل برداشت کرنے پر مجبور ہیں جس کا مطلب ملت ایران کی قوت و توانائی کے علاوہ کچھ نہیں ہے۔
قائد انقلاب اسلامی کا کہنا تھا کہ اسلامی جمہوریہ ایران کی طاقت و توانائی میں وسعت، ملت کی استقامت و مزاحمت اور عزیز سائنسدانوں کی جرئت اقدام اور جدت عملی کا ثمرہ ہے۔ آپ نے ایٹمی شعبے سے تعلق رکھنے والے شہیدوں، ان کے راستے پر چلنے والوں اور ان کے اہل خانہ کی قدردانی کرتے ہوئے فرمایا کہ اللہ کی رحمتیں نازل ہوں اس قوم پر جو اس طرح اپنی حق بات پر ڈٹی ہوئی ہے۔
قائد انقلاب اسلامی آیت اللہ العظمی خامنہ ای نے عید سعید فطر کے دوسرے خطبے کے اختتامی حصے میں ایران کی فوج کو نابود کر دینے کی توانائی سے متعلق امریکی صدر کے بیان کا حوالہ دیتے ہوئے کہا کہ پرانے زمانے میں اس طرح کی باتوں کو 'لاف در غریبی' (کسی فرومایہ آدمی کا ناآشنا لوگوں کے درمیان بڑی بڑی باتیں کرنا) کہا جاتا تھا۔
قائد انقلاب اسلامی نے امریکی حکام کو مخاطب کرکے فرمایا: ہم کسی بھی جنگ کا استقبال نہیں کرتے اور کوئی بھی جنگ شروع نہیں کرنا چاہتے لیکن اگر جنگ ہو گئی تو میدان سے نادم ہوکر باہر نکلنے والا جارح اور مجرم امریکا ہوگا۔