Aug ۰۶, ۲۰۲۰ ۲۲:۳۲ Asia/Tehran
  • پوری دنیا کے نیک لوگوں سے آیت اللہ العظمی سیستانی کی اپیل

عراق کے بزرگ مرجع تقلید آيت اللہ العظمی سیستانی نے لبنان کے دارالحکومت بیروت میں ہونے والے بھیانک دھماکے کے بعد ایک بیان جاری کر کے پوری دنیا کے نیک انسانوں سے اپیل کی ہے کہ وہ لبنان کی مدد کریں۔

آیت اللہ العظمی سید علی سیستانی کے دفتر کی جانب سے جاری ہونے والے بیان میں کہا گيا ہے کہ نجف کی اعلی دینی قیادت بیروت میں ہونے والے دردناک دھماکے پر غمگين ہے، جس میں بہت سے لوگ جاں بحق ہوئے، بہت سے زخمی ہوئے اور دسیوں ہزار لوگ بے گھر ہو گئے۔ بیان میں کہا گيا ہے کہ رنج و غم کی اس گھڑی میں لبنان کے عوام کو دلی تعزیت پیش کرتے ہیں اور خداوند عالم سے دعا کرتے ہیں کہ وہ انھیں اس بڑے امتحان سے گزر جانے کا حوصلہ اور صبر عطا کرے۔

آيت اللہ العظمی سیستانی کے بیان میں کہا گيا ہے کہ ہم دنیا بھر کے مذہبی اور نیک لوگوں سے اپیل کرتے ہیں کہ وہ ان سخت حالات میں لبنانی عوام سے یکجہتی کا مظاہرہ کریں اور ان کی مدد کریں تاکہ اس المیے کے بعد ان کے مصائب اور غم میں کمی آ سکے۔ بیان کے آخر میں کہا گيا ہے کہ ہم خداوند متعال سے دعا کرتے ہیں کہ وہ اس حادثے میں جاں بحق ہونے والوں کو اپنے سایۂ رحمت میں جگہ دے، ان کے اہل خانہ کو صبر و تحمل عطا کرے اور زخمی ہونے والوں کو جلد از جلد صحت و شفا عطا کرے۔

ٹیگس

کمنٹس