SAHAR

شام کے لئے اقوام متحدہ کے خصوصی ایلچی اسٹیفن ڈی مستورانے شام میں دہشت گردوں کے خلاف ایک مشترکہ نقطہ نگاہ کی ضرورت پر زور دیا ہے۔

شام کے لئے اقوام متحدہ کے خصوصی ایلچی اسٹیفن ڈی مستورانے نیویارک میں ایک پریس کانفرنس میں کہا ہے کہ شام کے بارے میں ویانا مذاکرات میں شریک تمام ملکوں کو دہشت گرد گروہوں کے بارے میں ، ایک مشترکہ نقطہ نگاہ تک پہنچنا چاہئے۔

انھوں نے کہا کہ ہمارا فریضہ شام کے بحران کے سیاسی حل کے عمل میں روس، ایران اور سعودی عرب جیسے بڑے ملکوں کو شامل کرنا تھا۔ انھوں نے کہا کہ اب شام میں دہشت گرد گروہوں کے بارے میں ایک مشترکہ نظریئے تک پہنچنا ان مذاکرات میں شریک ملکوں کا کام ہے۔

انھوں نے عالمی طاقتوں سے اپیل کی کہ شام کے بحران کے تعلق سے جو نیا موڑ آیا ہے اس سے استفادہ اور آئندہ ویانا مذاکرات میں اس بحران کے سیاسی حل کی کوششوں کی تقویت کریں ۔

انھوں نے کہا کہ اس نئے موڑ کو ہاتھ سے نہیں جانے دینا چاہئے ۔ اسٹیفن ڈی مستورا نے کہا کہ شام کے بحران کے سیاسی حل کے لئے آئندہ مذاکرات کو نتیجہ خیز بنانے کی ضرورت ہے۔