شاہد خاقان عباسی عدالت میں پیش
پاکستان میں احتساب عدالت نے سابق وزیر اعظم شاہد خاقان عباسی کو تیرہ دن کے جسمانی ریمانڈ پر نیب کے حوالے کر دیا ہے۔
پاکستانی ذرائع کے مطابق نیب نے سابق وزیر اعظم شاہد خاقان عباسی کو جمعے کے دن اسلام آباد کی احتساب عدالت میں پیش کیا۔ عدالت نے سابق وزیر اعظم کے تیرہ دن کے جسمانی ریمانڈ کی نیب کی درخواست منظور کر لی۔
احتساب عدالت نے نیب کو حکم دیا ہے کہ شاہد خاقان عباسی کو یکم اگست کو دوبارہ عدالت میں پیش کیا جائے ۔سابق وزیر اعظم شاہد خاقان عباسی نے عدالت میں پیشی کے وقت صحافیوں سے گفتگو میں اپنے اوپر لگائے گئے الزام کو بے بنیاد قرار دیتے ہوئے کہا کہ ان پر جو مقدمہ بنایا گیا ہے وہ کاغذ پر لکھنے کے قابل بھی نہیں ہے۔
یاد رہے کہ شاہد خاقان عباسی کو نیب نے جمعرات کو اس وقت گرفتار کر لیا تھا جب وہ شہباز شریف کی پریس کانفرنس میں شرکت کے لئے لاہور جا رہے تھے۔ شاہد خاقان عباسی پر ایل این جی ٹرمینل کیس میں اپنے اختیارات کا ناجائز استعمال، اور قومی خزانے کو ڈیڑھ ارب روپئے کا نقصان پہنچانے کا الزام ہے۔