SAHAR

ہندوستان کی کانگریس پارٹی کے سینئر رہنما دگ وجے سنگھ نے کہا ہے کہ مغل حکمرانوں نے ہندو مذہب کو آگے بڑھنے کا موقع فراہم کیا ہے

کانگریس پارٹی کے رہنما دگ وجے سنگھ نے کہا کہ اگر آپ مغلیہ دور سلطنت پر غور کریں تو آپ دیکھیں گے کہ انھوں نے ہندؤں کو آگے بڑھنے کا موقع دیا- انھوں نے کہا کہ مغلوں نے سناتن مذہب کو زیادہ عزت و احترام دیا- کانگریس کے اس سینئر رہنما کا کہنا ہے کہ اگر مغل حکمراں چاہتے تو ہندوستان کو اسلامی ملک میں تبدیل کر سکتے تھے- دگ وجے سنگھ نے کہا کہ مغل ایسا کر سکتے تھے کیونکہ انھوں نے اس ملک پر پانچ سو سے زیادہ برسوں تک حکومت کی لیکن مغلوں نے ایسا نہیں کیا-

کانگریس کے مرکزی رہنما نے کہا کہ مغلوں کی فوج میں ہندو جنرل اور ہندو مشیر بھی تھے - دگ وجے سنگھ نے کہا کہ اگر آپ اکبر کے نو رتنوں کے بارے میں معلوم کریں تو آپ کو معلوم ہوگا کہ ان میں سے زیادہ تر ہندو تھے-

اس کانگریسی لیڈر نے کہا کہ یہ ہندوستان کی عظمت ہے جسے بدقسمتی سے بی جے پی برباد کر رہی ہے- انھوں نے کہا کہ بی جے پی کے لیڈر قانون کو اپنے ہاتھ میں لئے ہوئے ہیں اور مذہب کے نام پر لوگوں کو تقسیم کر رہے ہیں- دگ وجے سنگھ نے کہا کہ اگر آپ اسے بڑھاوا دیں گے تو اقلیتوں کی جانب سے اس پر ردعمل ہونا یقینی ہے-