ریاست آسام میں سڑک حادثہ دسیوں ہلاک
ہندوستان کی ریاست آسام میں ایک خوفناک سڑک حادثے میں کم سے کم تیس افراد ہلاک ہو گئے ہیں-
گوہاٹی سے موصولہ خبروں میں بتایا گیا ہےکہ یہ خوفناک حادثہ اس وقت پیش آیا جب ایک مسافر بس ریاست آسام کے ایسٹ جنتیا کے سونم پور علاقے میں پانچ سو فٹ گہری کھائی میں جا گری- حکام کا کہنا ہے کہ یہ بس سیلچر سے ریاستی دارالحکومت گوہاٹی جا رہی تھی- حادثہ منگل اور بدھ کی درمیانی رات پیش آیا -
بتایا جاتا ہے کہ ریاست آسام میں ایسٹ جنتیا کا سونم پور کا علاقہ جہاں یہ حادثہ پیش آیا ہے، سڑک کے راستے کے اعتبار سے انتہائی خطرناک علاقہ ہے لیکن اس طرح کا حادثہ یہاں پہلی بار ہوا ہے-
حادثے میں زندہ بچ جانے والے ایک شخص نے ایمبولینس کے محکمے کو فون کر کے حادثے کی اطلاع دی جس کے بعد ڈاکٹر اور امدادی ٹیموں کے ساتھ ساتھ پولیس کی ٹیمیں بھی وہاں پہنچ گئیں-
حکام کا کہنا ہے کہ چونکہ بس بہت ہی گہری کھائی میں گری تھی اس لئے امدادی کاموں میں کافی مشکلات پیش آئیں - اس حادثے میں چار افراد زخمی بھی ہوئے ہیں-
