کشمیرمیں جھڑپیں 6 افراد ہلاک، مکمل ہڑتال
Apr ۲۵, ۲۰۱۸ ۰۷:۵۹ Asia/Tehran
ہندوستان کے زیر انتظام کشمیر کے پہاڑی علاقے لام ترال میں فوج اورعسکریت پسندوں کے درمیان خونریز تصادم میں 4 عسکریت پسند اور فورسز کے 2اہلکار ہلاک جبکہ 2 اہلکار شدید زخمی ہوئے۔
موصولہ رپورٹوں کے مطابق ہندوستان کے زیر انتظام کشمیرکے قصبہ ترال سے تقریباً 20کلومیٹر دوردیدار پورہ لام کے پہاڑی سلسلے میں عسکریت پسندوں اور سکیورٹی فورسز کے مابین شدید فائرنگ ہوئی جو کافی دیر تک جاری رہا۔ خونریز تصادم میں 4 عسکریت پسند اور فورسز کے 2اہلکار ہلاک جبکہ 2 اہلکار شدید زخمی ہوئے۔
انسپکٹر جنرل آف پولیس کشمیر زون سوئم پرکاش پانی نے کہا کہ ترال معرکہ میں مارے گئے عسکریت پسندوں کا تعلق جیش سے ہے ۔
لام ترال جنگل واقعہ کے خلاف ترال، آری پل کے ساتھ ساتھ قصبے کے دیگر مقامات پر مکمل ہڑتال کی گئی جس کی وجہ سے معمولات زندگی بری طرح متاثر رہی ۔
