SAHAR

ہندوستان کی سرکاری خبررساں ایجنسی یو این آئی کے مطابق بدھ کو کانگریسی اراکین کے ہنگامے کی وجہ سے پارلیمنٹ کے ایوان زیریں لوک سبھا میں وقفہ سوالات اور وقفہ صفر نہیں ہو سکا۔ 

رپورٹ کے مطابق ایوان کی کارروائی جیسے ہی شروع ہوئی کانگریسی اراکین نے اپنے سات اراکین کی معطلی کے مسئلے میں ہنگامہ اور شور مچانا شروع کردیا جس کی وجہ سے کارروائی دو پہر تک کے لئے ملتوی کردی گئی ۔ 

دوپہر ساڑھے بارہ بجے ایوان کی کارروائی جیسے ہی شروع ہوئی کانگریس کے بعض ممبران پارلیمنٹ، پارٹی کے سات ارکان کی معطلی منسوخ کرنے کا مطالبہ دوبارہ شروع کردیا۔ 

کانگریسی اراکین نعرے بازی کرتے ہوئے اسپیکر کی چیئر کے قریب پہنچ گئے جس پر پریزائیڈنگ ڈپٹی اسپیکر راجندر اگروال نے فوری طور پر ایوان کی کارروائی دوبارہ ملتوی کردی ۔ 

ادھر ہندوستانی پارلیمنٹ کے ایوان بالا راجیہ سبھا میں کیرالہ کے دو نیوز چینلوں پر لگائی گئی پابندیوں اور دیگر مسائل پر اپوزیشن ارکان کے ہنگامے کی وجہ سے بدھ کو وقفہ صفر اور سوالات نہیں ہو سکا اور کارروائی دوپہر دو بجے تک کے لئے ملتوی کر دی گئی ۔

ایوان کی کارروائی شروع ہونے پر ضروری دستاویزات ایوان میں رکھے جانے کے بعد اپوزیشن ارکان نے کیرالہ کے دو نیوز چینلوں پر دو دن کے لئے لگائی گئی پابندیوں اور دیگر ایشوز کے حوالہ سے شور شرابہ شروع کردیا۔ اس پر چیئرمین ایم وینکیا نائیڈو نے کہا کہ متعلقہ نیوز چینلوں پر عائد کی گئی پابندی ہٹا لی گئی ہے جس کے بعد اس مسئلے کو اٹھانا مناسب نہیں ہے۔

لیکن اپوزیشن کے ارکان نے حکومت کے اس اقدام کی مذمت میں نعرے بازی جاری رکھی جس پر انھوں نے کارروائی ملتوی کرنے کا اعلان کردیا۔