ہندوستان، توہین رسالت پر مظاہرے اور پاکستان کا شدید رد عمل+ ویڈیو
ہندوستان کی ریاست کرناٹک کے دار الحکومت بنگلورو میں کانگریس پارٹی کے رہنما کے رشتہ دار کی توہین رسالت پر مبنی پوسٹ سے جہاں شہر میں پر تشدد مظاہرے ہوئے وہیں اس پر پاکستان سمیت متعدد ممالک نے اعتراض کیا ہے۔
پاکستان کی وزارت خارجہ کے بیان میں کہا گیا ہے کہ اس مسئلے پر ہندوستانی ہائی کمیشن کے ذریعے واقعے کی شدید الفاظ میں مذمت ریکارڈ کرائی گئی۔
بیان میں کہا گیا ہے کہ اسلام مخالف پوسٹ سے مسلمانوں نے جذبے مجروح ہوئے ہیں اور یہ ہندوستان میں بڑھتے اسلاموفوبیا اور اقلیتوں کو نشانہ بنائے جانے کی مثال ہے۔
واضح رہے کہ ہندوستانی ریاست کرناٹک کے شہر بنگلورو میں فسادات کی آگ تب بھڑکی جب کانگریس کے رکن اسمبلی کے ایک رشتے دار نے رسول اسلام کی شان میں گستاخی کرتے ہوئے ایک توہین آمیز پوسٹ فیس بک پر شائع کی۔
مقامی مسلمانوں نے ملزم کی فوری گرفتاری اور اس کے خلاف مقدمہ درج کرانے کے لئے علاقے کے پولیس تھانے میں درخواست دی تاہم پولیس نے اُس پر کوئی نوٹس نہیں لیا۔
