غلام نبی آزاد نے قابل تقلید کردار پیش کیا ہے: وزیر اعظم مودی
ہندوستانی کانگریس پارٹی کے سینیئر رہنما اور راجیہ سبھا کے رکن غلام نبی آزاد نے کہا ہے کہ انہیں ہندوستانی مسلمان ہونے پر فخر ہے۔
کانگریس پارٹی کے سینئیر رہنما غلام نبی آزاد نے منگل کو پارلیمنٹ کے ایوان بالا راجیہ سبھا میں اپنے الوداعی تقریر میں کہا کہ انہیں اس بات پر فخر ہے کہ وہ ہندوستانی مسلمان ہیں۔ انہوں نے کہا کہ وہ سمجھتے ہیں کہ ہندوستان کے سبھی مسلمانوں کو اپنے مسلمان ہونے پر فخر ہونا چاہئے۔
ایوان میں غلام نبی آزاد کی الوداعی تقریب سے خطاب میں ہندوستان کے وزیر اعظم نریندر مودی نے رکن پارلیمنٹ کی حیثیت سے ان کے رویئے اور طرزعمل کو قابل تقلید قرار دیا۔ انہوں نے کہا کہ غلام نبی آزاد نے پارلیمنٹ میں اپنی رکنیت کے دوران ہمیشہ پارلیمنٹ کے وقار اور جمہوری اصولوں کا خیال رکھا ہے اور پارلیمنٹیرین کی حیثیت سے قابل تقلید کردار پیش کیا ہے۔
انہوں نے کہا کہ غلام نبی آزاد نے کبھی قائد حزب اختلاف کی حیثیت سے اپنا تسلط جمانے کی کوشش نہیں کی بلکہ اپنی پارٹی کے ساتھ ہی ملک اور ایوان کی بھی فکر کی ہے۔
