ایٹمی شعبے میں حاصل ہونے والا افتخار ایٹمی سائنس دانوں اور شہدا کی مجاہدت کا مرہون منت ہے: صدر مملکت
-
صدر مملکت ڈاکٹر حسن روحانی نے اتوار کے روز ایران کے ایٹمی شہدا کے اہل خانہ سے ملاقات کی۔
اسلامی جمہوریہ ایران کے صدر ڈاکٹر حسن روحانی نے ایٹمی شہدا کے اہل خانہ سے ملاقات میں ایٹمی معاہدے میں حاصل ہونے والی کامیابی کو ایران کے سپوتوں اور ایٹمی شہدا کی مجاہدت اور ان کے اہل خانہ کے صبر و استقامت کا نتیجہ قرار دیا ہے۔
ہمارے نمائندے کی رپورٹ کے مطابق، صدر مملکت ڈاکٹر حسن روحانی نے اتوار کے روز ایران کے ایٹمی شہدا کے اہل خانہ سے ملاقات میں کہا کہ ایٹمی شعبے میں حاصل ہونے والا افتخار ایٹمی سائنس دانوں اور شہدا کی مجاہدت کا مرہون منت ہے کہ جنھوں نے ملک کی سائنسی ترقی اور استقلال و خودمختاری کے راستے میں اپنی جان قربان کر دی۔
اس ملاقات میں کہ جس میں وزیر خارجہ اور ایٹمی توانائی کے ادارے کے سربراہ بھی موجود تھے، صدر مملکت نے شہدا کے اہل خانہ کو مشترکہ جامع ایکشن پلان پر عمل درآمد کے سلسلے میں اسلامی جمہوریہ ایران کی کامیابی کی مبارک باد پیش کرتے ہوئے کہا کہ حقیقی مبارک باد آپ شہدا کے اہل خانہ کو دی جانی چاہیے کہ آپ نے بے مثال صبر سے اور اپنے عزیزوں کو قربان کر کے اس راستے پر اہم قدم اٹھائے ہیں۔ انھوں نے مزید کہا کہ شہدا خصوصا ایٹمی شہدا کے اہل خانہ ہمیشہ اپنے صبر و استقامت کی وجہ سے سربلند و سرفراز ہیں اور ہم امید کرتے ہیں کہ ہم تمام شہدا کے اہل خانہ کے خدمت گذار بن سکیں گے اور ان عزیزوں کے راستے کو جاری رکھ سکیں گے۔
ایٹمی شہدا کے اہل خانہ نے بھی اس ملاقات میں حکومت اور ایٹمی مذاکراتی ٹیم کی کوششوں کی تعریف کرتے ہوئے کہا کہ اس معاہدے تک پہنچنا ایک بہت ہی مشکل کام تھا کہ جو عوام کی خوشی کا باعث بنا اور خدا اس اچھے کام کا اجر حکام اور عہدیداروں کو عطا کرے گا۔
