پاکستان، ایران کے ساتھ تعلقات کو قدر کی نگاہ سے دیکھتا ہے
پاکستان کی وزیرمملکت اطلاعات مریم اورنگزیب سے پاکستان میں تعینات ایران کے سفیر مہدی ہنر دوست نے ملاقات کی جس میں دوطرفہ امور پر تفصیلی تبادلہ خیال کیا گیا ہے۔
اس موقع پر وزیر مملکت اطلاعات اونگزیب کا کہنا تھا کہ دونوں ممالک کے تعلقات مشترکہ ورثے، مذہبی اور ثقافتی اقدار میں بندھے ہوئے ہیں، پاکستان ایران کے ساتھ ثقافتی اور عوامی رابطوں کے فروغ کا خواہاں ہے۔ وزیر مملکت اطلاعات نے ثقافتی اور میڈیا وفود کے تبادلوں کی ضرورت پر زور دیا اور اس ضمن میں وزارت اطلاعات کے متعلقہ حکام کو ایرانی سفارتخانے سے رابطہ قائم کرنے کی ہدایات جاری کیں۔
ایرانی سفیر اور وزیر مملکت نے دونوں ملکوں کے درمیان میڈیا، ثقافت اور اطلاعات کے شعبے میں باہمی تعاون بڑھانے کی مختلف تجاویز پر غور کیا۔ وزیر مملکت اطلاعات نے ورثے اور اقدار کے فروغ کے لیے فلم اور ڈرامہ کے شعبے میں ایرانی سفیر کو مشترکہ پروڈکشنز کی تجویز دی جس پر ایرانی سفیر نے وزیر مملکت کو نیشنل براڈ کاسٹنگ اینڈ فلم کمیشن کے قیام میں بھرپور تعاون کو یقین دہانی کرائی۔
