پاکستان - ایران گیس پائپ لائن کی تکمیل کے لئے پرعزم
پاکستان کا کہنا ہے کہ وہ ایران گیس پائپ لائن کی تکمیل کے لئے پرعزم ہے۔
پاکستان میں ایرانی سفیر مہدی ہنردوست کی وفاقی وزیرپیٹرولیم سے ملاقات ہوئی جس میں پاک - ایران گیس لائن منصوبے پر بات چیت کی گئی۔
ایرانی سفیر نے کہا کہ ایران پاکستان گیس پائپ لائن خطے میں گیم چینجر ہوگی ۔ اس موقع پر ایرانی سفیر نے پیٹرولیم مصنوعات کی اسمگلنگ کی روک تھام میں تعاون کی یقین دہانی بھی کرائی۔
اس موقع پر مہدی ہنردوست نے وفاقی وزیر غلام سرور خان کو دورہ ایران کی دعوت بھی دی۔
وفاقی وزیر غلام سرور خان نے دورہ ایران کی دعوت قبول کرتے ہوئے کہا کہ دورے سے قبل ایران - پاکستان گیس پائپ لائن منصوبے پر دونوں ملکوں کے ورکنگ گروپ کا اجلاس ہو گا ۔
پاکستان کے وفاقی وزیر پیٹرولیم غلام سرور خان نے کہا کہ پاکستان بغیر کسی بیرونی دباؤ کے ایران - پاکستان گیس پائپ لائن کی تکمیل کے لئے پر عزم ہے۔
وفاقی وزیر نے کہا کہ بدقسمتی سے گیس پائپ منصوبہ ماضی میں عالمی پابندیوں کا شکار رہا، ایران - پاکستان گیس پائپ لائن منصوبے کو کسی بھی دوسرے منصوبے پر ترجیح حاصل ہے ۔
