SAHAR

ایران کے حوزات علمیہ کے سربراہ آیت اللہ علی رضا اعرافی نے ہندوستان کے مذہبی رہنماؤں کے نام ایک خط میں کورونا وائرس کے پھیلاؤ کی جانب اشارہ کرتے ہوئے لکھا ہے کہ کورونا وائرس اور عصر حاضر کے دیگر چیلنجوں پر قابو پانے کے لیے عالمی ہم آہنگی اور تعاون کے ذریعے بعض تسلط پسند ملکوں کی غیر ذمہ دارانہ پالیسیوں اور یکطرفہ اقدامات کا مقابلہ کیے جانے پر زور دیا ہے۔

انہوں نے اپنے خط میں ناانصافیوں، امتیازی سلوک، غیر انسانی پابندیوں، جنگ، دہشت گردی اور عام تباہی پھیلانے والے ہتھیاروں کی تیاری اور نگہداشت جیسے مسائل کو عصر حاضر کے لئے اہم ترین چیلنج قرار دیا ہے۔

آیت اللہ اعرافی کے خط میں آیا ہے کہ اس قسم کے بحرانوں کی صحیح اور سائنٹفک تشریح اور ان سے نمٹنے کی طریقہ کار کی وضاحت نیز دین و سائنس کے درمیان غیر حقیقی پولارائزیشن سے گریز دنیا بھر کے دانشوروں اور حکام کی ذمہ داری ہے جبکہ اس حوالے سے مذہبی رہنماؤں کی ذمہ داریاں دوگنا زیادہ ہیں۔

ایران کے حوزہ علمیہ کے منتظم اعلی نے کورونا متاثرین اور اس بیماری سے مرنے والوں کے لواحقین سے ہمدردی کا اظہار کرتے ہوئے ہندوستان سمیت ساری دنیا کے لیے ہر قسم کی بلاؤں اور مصیبتوں سے دور رہنے کی امید ظاہر کی ہے۔

اس سے پہلے ایران کے حوزہ علمیہ کے منتظم اعلی آیت اللہ اعرافی نے کیتھولک عیسائیوں کے عالمی رہنما پاپ فرانسس، اسلامی ملکوں کے تعلیمی، سائنسی اور ثقافتی ادارے آئی سسکو کے سربراہ سالم بن محمد المالک، شیخ الاظہر، شیخ احمد الطیب اور یونیسکو کی سربراہ محترمہ ایڈرے ایذولے کے نام لکھے گئے خطوط میں باہمی تعاون کی ضرورت پر زور دیا تھا۔