SAHAR

ایران کی وزارت صحت کی ترجمان سیما سادات لاری نے اتوار کے روز ایران میں کورونا کی صورت حال پر روشنی ڈالتے ہوئے کہا ہے کہ گزشتہ چوبیس گھنٹے میں کورونا کے ایک ہزار نو سو بانوے نئے مریضوں کا اندراج کیا گیا جن میں سے نو سو پانچ مریضوں کو اسپتالوں میں ایڈمٹ اور باقی کو ابتدائی معالجے اور ضروری ہدایات کے بعد گھروں کو واپس بھیج دیا گیا۔

سیما سادات لاری نے کہا کہ ایران میں کورونا سے متاثرین کی مجموعی تعداد تین لاکھ چھیاسی ہزار چھے سو اٹھاون تک پہنچ گئی ہے جبکہ گزشتہ چوبیس گھنٹے کے دوران ایک سو انتالیس مریض جان کی بازی ہار گئے اور اب مرنے والوں کی مجموعی تعداد بائیس ہزار دو سو ترانوے ہو گئی ہے۔

ایران کی وزارت صحت کی ترجمان نے بتایا کہ اب تک تین لاکھ تینتیس ہزار نو سو مریض کورونا کو شکست دینے میں کامیاب رہے ہیں اور اسپتالوں سے ڈسچارج ہو کر اپنے گھروں کو واپس جا چکے ہیں۔

واضح رہے کہ  دنیا میں کورونا وائرس کا شکار ہونے والوں کی تعداد دو کروڑ ستر لاکھ ہو چکی ہے جن میں سے آٹھ لاکھ چوراسی ہزار کورونا مریض جان کی بازی ہار چکے ہیں جبکہ تقریبا دو کروڑ دیگر کورونا مریض صحتیاب ہو کر اپنے گھروں کو واپس جا چکے ہیں۔