SAHAR

ایران کے مایہ ناز فٹبالر مهرداد میناوند 46 سال کی عمر میں کورونا وائرس میں مبتلا ہونے کی وجہ سے انتقال کر گئے۔

ہمارے نمائندے کی رپورٹ کے مطابق ایران کے مایہ ناز فٹبالر مهرداد میناوند گزشتہ چند روز سے کورونا میں مبتلا ہونے کی وجہ سے ہسپتال میں داخل تھے تاہم وہ اس بیماری کو شکست دینے میں کامیاب نہیں ہوئے اور کل رات انتقال کر گئے۔

 مهرداد میناوند کے انتقال پر عالمی فٹبال فیڈریشن فیفا، ایشیاء فٹبال فیڈریشن (ای ایف سی) اور کھیل کے شعبے سے تعلق رکھنے والی شخصیات نے تعزیت کا اظہار کیا ہے۔

 مهرداد میناوند 30 نومبر 1975 کو پیدا ہوئے اور انہوں نے  ایران کی پرسپولیس، جارجیا کی اشٹروم گراٹس، امارات کی الشباب اور ایران کی سپاہان فٹبال ٹیموں میں عمدہ کھیل کا مظاہرہ کرتے ہوئے عالمی شہرت پائی۔