ایران عراق تعلقات کے فروغ پر زور
ایران کے وزیر انٹیلی جینس سید محمود علوی نے بغداد میں عراق کے صدر برھم صالح سے ملاقات کی ہے۔
ہمارے نمائندے کے مطابق عراق کے صدر اور ایران کے انٹیلی جینس کے وزیر کے درمیان ملاقات میں دونوں ملکوں کے عوام کے لیے تہران بغداد تعلقات کی اہمیت کے بارے میں تبادلہ خیال کیا گیا۔
برھم صالحی اور محمود علوی نے مختلف شعبوں میں عراق ایران تعلقات کے فروغ پر زور دیا۔
ایران کے وزیر انٹیلی جینس نے حکومت ایران اور ایرانی عوام کی جانب سے، صوبہ ذیقار کے امام حسین(ع) اسپتال میں آتشزدگی کے سانحے میں قیمتی جانوں کے نقصان پر، عراقی صدر کو تعزیت بھی پیش کی۔
سید محمود علوی نے دونوں ملکوں کی حکومتوں اور عوام کے درمیان تعلقات کی اہمیت کی جانب سے اشارہ کرتے ہوئے کہا کہ ایران، عراق میں امن و استحکام کےلئے بھرپور حمایت کرتا رہے گا۔
ایران کے وزیر انٹیلی جینس نے خطے میں دہشت گردی اور انتہاپسندی کے خلاف جنگ اور قیام امن کے حوالے سے تہران اور بغداد کے درمیان تعاون اور ہم آہنگی کا سلسلہ جاری رکھنے کی ضرورت پر زور دیا۔
صدر برھم صالح نے عراق اور ایران کے درمیان تاریخی رشتوں کی جانب اشارہ کرتے ہوئے باہمی تعلقات کے فروغ کو ضروری قرار دیا۔
عراقی صدر نے دہشت گردی کے خلاف جنگ میں عراق کا ساتھ دینے اور داعش کی شکست میں ایران کے بنیادی کردار کی بھی قدردانی کی۔
ایران کے وزیر انٹیلی جینس نے بغداد پہنچنے کے فورا بعد سپاہ قدس کے کمانڈر شہید قاسم سلیمانی اور شہید ابومہدی المہندس کی جائے شہادت پر حاضری دی اور فاتحہ خوانی کی۔
