ایران کے کسی بھی شہر پر بیرونی حملے کی تردید
ایران کے مرکزي شہر اصفہان اور شمال مغربی ایران کے صوبے مشرقی آذربائیجان کے شہر تبریز ميں ایئر ڈیفنس سسٹم فضا میں کچھ مشکوک چیزوں کے مشاہدے کے ساتھ ہی فعال ہوگيا اور اس پر فائرنگ کردی-
سحرنیوز/ ایران: موصولہ رپورٹ کے مطابق اصفہان اور تبریز شہروں کے ایئر ڈیفنس سسٹم کو مشتبہ اشیاء کے مشاہدے کے بعد فعال کر دیا گیا۔ ان شہروں میں دھماکوں کی بعض اطلاعات کے باوجود باخبر ذرائع کے مطابق، دھماکہ ہونے یا میزائل لگنے کی کوئی اطلاع نہیں ہے۔
ایرانی آرمی کے اعلی افسر میہن دوست نے کہا ہے کہ صوبہ اصفہان کے نواحی علاقوں میں علی الصبح چار بجے کئی دھماکوں کی آوازیں سنی گئیں۔ ان کے مطابق صوبے کے مشرقی علاقے میں کوئی مشکوک چیز فضا میں دیکھی گئی جس کے بعد دفاعی سسٹم نے اس پر فائرنگ کردی۔ تاحال ان مشکوک اشیاء کے بارے میں کوئی تفصیلات نہیں ہیں۔
اس رپورٹ کے مطابق انتہائی حساسیت کی وجہ سے ایئر ڈیفنس نے اصفہان ایئر بیس کے اطراف میں فائر کئے- اس کے علاوہ تبریز شہر کے مغرب میں اور وادی رحمت کے اطراف میں بھی ایک مشکوک چیز کے نظر آنے کے بعد تبریز ایئر ڈیفنس کو فعال کر دیا گیا۔ مقامی ذرائع کے مطابق واقعے میں کسی قسم کا کوئی نقصان نہیں ہوا ہے اور ان شہروں میں حالات معمول پر ہیں۔
