SAHAR

ایران کی وزارت اسلامی ثقافت اور ارشاد اسلامی نے اکتیس ممالک کے ایک سو پچاس سے زائد غیر ملکی میڈیا کے ذریعے ایران کے صدارتی انتخابات کی کوریج کی خبر دی ہے۔

سحرنیوز/ایران: ایران کی اسلامی ثقافت و ہدایت کی وزارت کے شعبہ رابطہ عامہ کے ڈائریکٹر علی رضا شیروی نے بتایا ہے کہ دنیا کے اکتیس ملکوں کے ایک سو پچاس میڈیا ہاؤسز کے پانچ سو سے زائد نمائندے ایران کے چودھویں صدارتی الیکشن کی رپورٹنگ کریں گے۔
وزارت اسلامی ثقافت و ہدایت کے بیرونی ابلاغیاتی اداروں کے شعبے کے ڈائریکٹر جنرل نے مزید بتایا کہ بہت سے ملکوں نے صدارتی الیکشن کی کوریج کے لئے اپنے رپورٹروں کے لئے درخواستیں بھیجی ہیں اور اب تک آسٹریا، اسپین، آسٹریلیا، امریکا، برطانیہ، اٹلی، آذربائیجان، جرمنی، بحرین، پاکستان، ترکیہ، الجزائر، چین، ڈینمارک، روس، زمبابوے، جاپان، شام، سویڈن، عراق، عمان، فرانس، فلسطین، کرغیزستان، قطر، جنوبی کوریا، شمالی کوریا، کولمبیا، کویت لبنان اور یمن کے رپورٹروں کی آمد یقینی ہوچکی ہے۔
یاد رہے کہ ایران کے چودھویں صدارتی الیکشن جمعہ اٹھائیس جون کو ہوں گے-