ملکی فضائی سرحدیں محفوظ، ایئر ڈیفنس سسٹم ہر خطرے سے نمٹنے کے لیے تیار: جنرل صباحی فرد
ایرانی فوج کے اعلی افسر نے کہا ہے کہ مسلح افواج کے اہلکار دن رات چوکس ہیں اور ملک کا بہترین دفاع کرسکتے ہیں۔
سحرنیوز/ایران: ایرانی مسلح افواج کے سینیئر کمانڈر بریگیڈیئر جنرل صباحی فرد نے کہا ہے کہ ملک کی فضائی دفاعی فورسز پوری قوت کے ساتھ فضائی حدود کی حفاظت کر رہی ہیں اور ہر طرح کی ممکنہ جارحیت کی صورت میں دفاع کے لیے تیار ہیں۔
خاتم الانبیاء ایئر ڈیفنس بیس کے کمانڈر نے واضح کیا کہ فضائی دفاعی یونٹس شب و روز چوکنا ہیں، دشمن کی فضائی سرگرمیوں پر مسلسل نظر رکھی جا رہی ہے، اور خداوند متعال پر توکل کے ساتھ ایران دشمن کو گھٹنے ٹیکنے پر مجبور کرے گا۔
قبل ازیں، ایک سینیئر فوجی عہدیدار نے بتایا تھا کہ امریکہ-اسرائیل کی مسلط کردہ جنگ کے دوران تباہ شدہ فضائی دفاعی نظام کو مؤثر انداز میں تبدیل کیا جا چکا ہے۔
واضح رہے کہ اسرائیلی حکومت نے 13 جون کو ایران پر جارحانہ حملے کا آغاز کیا، جو 12 روز تک جاری رہا۔ ایران کی مسلح افواج نے اس حملے کا بھرپور جواب دیا، جس کے بعد اسرائیل اور امریکہ جنگ بندی کی درخواست پر مجبور ہوئے۔
ایرانی افواج نے اعلان کیا ہے کہ اگر صہیونی حکومت جنگ بندی کی خلاف ورزی کرتے ہوئے دوبارہ جارحیت کرتی ہے، تو وہ دشمن کو ناکوں چنے چبوانے کے لیے مکمل تیار ہیں۔
