SAHAR

افغان طالبان نے جنوبی مشرقی صوبے پکتیا کے ایک شہر پر قبضہ کرنے کا دعوی کیا ہے۔

طالبان کے ترجمان ذبیح اللہ مجاہد نے دعوی کیا کہ صوبہ پکتیا کے شہر دندہ و پٹان پر قبضہ کرلیا ہے۔ انہوں نےکہا کہ اس دوران ہونے والی لڑائی میں تین افغان پولیس اہلکارہلاک اور سات دیگر زخمی ہوگئے۔

طالبان کے ترجمان نے یہ بھی دعوی کیا کہ شہر میں طالبان کو سرکوب کرنے کے لیے بھیجی جانے والے قومی فوج کے دستوں کو بھی پیچھے دھکیل دیا گیا ہے۔

دوسری جانب شمالی افغانستان کے صوبے قندوز کے پولیس چیف محمد قسیم منگل باغ نے کہا ہے کہ دشت ارچی کے علاقے میں جاری آپریشن کے دوران چالیس طالبان ہلاک ہوگئے ہیں۔ انہوں نے کہا کہ شہر کے بڑے حصے کو طالبان کے قبضے آزاد کرالیا گیا ہے۔