شام: دمشق میں دہشت گردانہ کار بم دھماکہ، متعدد افراد جاں بحق و زخمی
شام کے دارالحکومت دمشق میں ایک دہشت گردانہ کار بم دھماکے میں کم سے کم آٹھ افراد جاں بحق اور متعدد دیگر زخمی ہو گئے۔
شام سے موصولہ خبروں میں کہا گیا ہے کہ دمشق کے محلے برزہ میں پولیس اسٹیشن کے قریب ایک کار بم دھماکے میں کم سے کم آٹھ افراد جاں بحق اور بیس دیگر زخمی ہو گئے۔
شامی فوج اورعوامی رضاکار فورس کے ہاتھوں ذلت آمیز شکست کھانے کے بعد دہشت گرد گروہوں نے اب عام شہریوں پر اپنے دہشت گردانہ حملے تیز کر دیئے ہیں۔
پچھلے ہفتے بھی دمشق کے مضافات میں واقع سیدہ زینب علاقے میں بھی، جہاں حضرت زینب سلام اللہ علیھا کا حرم واقع ہے، کئی بم دھماکوں میں ستّر سے زائد افراد جاں بحق اور ایک سو سے زائد زخمی ہو گئے تھے۔
گذشتہ ہفتے ہونے والے بم دھماکوں کے بعد شام کی وزارت خارجہ نے اپنے بیان میں اس دہشت گردانہ واقعے کی مذمت کرتے ہوئے کہا تھا کہ یہ دھماکے ترکی، سعودی عرب اور قطر کے حمایت یافتہ دہشت گردوں نے کئے ہیں تاکہ جنیوا امن مذاکرات کو ناکام بنایا جا سکے۔
