اقوام متحدہ اور سلامتی کونسل کے نام شام کی وزارت خارجہ کا مراسلہ
شام کی وزارت خارجہ نے اقوام متحدہ اور سلامتی کونسل کے نام اپنے مراسلوں میں ایک بار پھر کہا ہے کہ سعودی عرب، ترکی اور قطر، شام میں دہشت گرد گروہوں کی حمایت کر رہے ہیں۔
شام کی وزارت خارجہ نے اپنے مراسلوں میں تاکید کے ساتھ اعلان کیا ہے کہ دہشت گردوں کی جانب سے شام کے صوبے حلب میں فائر بندی کی خلاف ورزی نے ایک بار پھر اس بات کو ثابت کر دیا کہ سعودی عرب، ترکی اور قطر دہشت گردی کی حمایت کر رہے ہیں اور وہ سلامتی کونسل کی قراردادوں پرعمل نہیں کرتے۔
شام کی وزارت خارجہ کے مراسلے میں کہا گیا ہے کہ وسیع کوششوں کے بعد حلب میں فائر بندی کا نفاذ عمل میں آیا مگر تھوڑی ہی دیر کے بعد دہشت گرد گروہوں نے حلب کے مختلف رہائشی علاقوں منجملہ الخالدیہ، الزہرا، السلیمانیہ، صلاح الدین، العزیزیہ اور المیدان پر مارٹر گولوں اور میزائیلوں سے حملے شروع کر دیئے۔
ان مراسلوں کے مطابق دہشت گرد گروہ داعش نے حمص میں بھی موٹر سائیکل اور کار بم دھماکے کر کے بارہ عام شہریوں کو موت کے گھاٹ اتار دیا جبکہ یہ حملے ریاض، انقرہ اور دوحہ کی ہدایات پر اور فائر بندی کو مستحکم بنانے کی کوششوں اور جنیوا مذاکرات کو ناکام بنانے کے مقصد سے کئے گئے۔
شام کی وزارت خارجہ کے اس مراسلے میں تاکید کے ساتھ کہا گیا ہے کہ ان دہشت گردانہ حملوں سے دہشت گردی کا مقابلہ اور شامی فریقوں کے درمیان مذاکرات اور سیاسی طریقے سے بحران کو حل کرنے سے متعلق دمشق کے عزم و ارادے اور فیصلے پر کوئی اثر نہیں پڑے گا۔
