عراق: موصل کے مغرب میں دسیوں دہشت گردوں کی ہلاکت
موصل کے مغرب میں واقع شہر تلعفر میں عراقی فوج اور عوامی رضاکاروں کی کارروائیوں میں پچاس سے زائد دہشت گرد ہلاک ہوگئے۔
االعالم کی رپورٹ کے مطابق مغربی تلعفر کو آزادی کی کارروائی کے چھٹے مرحلے میں عراقی فوج اور عوامی رضاکاروں نے موصل کے جنوب مغرب میں الغزلانی فوجی اڈے کو، جو اس علاقے میں دہشت گردوں کا سب سے بڑا اڈہ شمار ہوتا ہے، اپنے کنٹرول میں لے لیا۔عراق کے عوامی رضاکاروں نے موصل میں حمام العلیل کے شمالی علاقے کو بھی آزاد کرا لیا۔دوسری جانب عراقی فوج نے عوامی رضاکارفورس کے تعاون سے موصل کے مغرب میں واقع الرّمان میں شدید لڑائیوں کے بعد موصل کے بین الاقوامی ایئرپورٹ کو دہشت گردوں کے قبضے سے مکمل آزاد کرا لیا اور دہشت گردوں کو بھاری نقصان پہنچایا۔عراق کی فضائیہ کے طیاروں نے بھی موصل ایئرپورٹ پر داعش دہشت گردوں کے ٹھکانوں کو نشانہ بنایا اور دہشت گردوں کی دفاعی لائنوں کو تباہ کر دیا۔واضح رہے کہ مغربی موصل کو آزاد کرانے کی کارروائی، عراقی وزیراعظم حیدر العبادی کے حکم سے گذشتہ اتوار کے روز شروع ہوئی ہے۔گذشتہ ماہ موصل کے مشرقی علاقوں کو دہشت گردوں کے قبضے سے آزاد کرایا گیا تھا جہاں کے لوگ اب اپنے گھروں کو واپس لوٹ رہے ہیں۔
