شام پر صیہونی حکومت کا فضائی حملہ، 2 عام شہری جاں بحق
May ۰۹, ۲۰۱۸ ۱۸:۰۲ Asia/Tehran
دمشق کے مضافاتی علاقے پر غاصب صیہونی حکومت کے جنگی طیاروں کے منگل کی رات کی جارحیت میں متعدد شامی شہری جاں بحق اور زخمی ہو گئے۔
شام کی سرکاری خبر رساں ایجنسی سانا کی رپورٹ کے مطابق شام کے دارالحکومت دمشق کے مضافاتی علاقے الکسورہ پر صیہونی حکومت کے جنگی طیاروں کے میزائل حملے میں دو عام شہریوں کے جاں بحق ہونے کے علاوہ ایک عورت زخمی بھی ہوئی ہے۔شام کے الاخباریہ ٹی وی نے رپورٹ دی ہے کہ الکسورہ کے علاقے میں شام کے ایئر ڈیفنس سسٹم نے صیہونی جنگی طیاروں کے دو میزائلوں کو تباہ کر دیا۔ مذکورہ ٹی وی نے اس اقدام کی تصاویر بھی نشر کی ہیں۔واضح رہے کہ شام میں دہشت گردوں کے ناکام ہو جانے کے بعد غاصب صیہونی حکومت نے مختلف علاقوں کو جارحیت کا نشانہ بنانا شروع کر دیا ہے جس کا مقصد شامی حکومت کو کمزور اور اس ملک کو مزید بدامنی سے دوچار کرنا ہے۔
