خطے میں سعودی عرب کی ساکھ بری طرح متاثر
امریکی یونیورسٹی جارج ٹاؤن کی پروفیسر شیریں ہینٹر کا کہنا ہے کہ جمال خاشقجی کے بہیمانہ قتل کے بعد خطے میں سعودی عرب کا اثرو نفوذ بہت کم ہوگیا ہے۔
مہر خبررساں ایجنسی کے بین الاقوامی امور کے نامہ نگار کے ساتھ گفتگو میں امریکی یونیورسٹی جارج ٹاؤن کی پروفیسر شیریں ہینٹر کا کہنا تھا کہ سعودی صحافی جمال خاشقجی کا قتل مشرق وسطی میں اس کے لئے اہم حادثہ تھا اور جمال خاشقجی کے بہیمانہ قتل کے بعد سعودی عرب کے حکام خاص طور پر سعودی عرب کے ولیعہد کا مکروہ چہرہ دنیا کے سامنے نمایاں ہوگیا اور خطے میں سعودی عرب کی ساکھ بھی متاثر ہوئی ہے۔ انہوں نے کہا کہ مغربی ممالک کی طرف سے سعودی عرب کی حمایت خود مغربی ممالک کے لئے مسئلہ بن رہی ہے مغربی ممالک خود سعودی عرب کی وجہ سے بدنام ہورہے ہیں کیونکہ مغربی ممالک کو دو میں سے ایک کام کرنا پڑےگا یا انھیں انسانی حقوق اور جمہوریت کی حمایت کرنی پڑےگی یا پھر سعودی عرب کے ڈکٹیٹر نظام کی حمایت جاری رکھنی پڑےگی انہوں نےکہا کہ مغربی ممالک کو اب سعودی عرب کے ساتھ تعلقات کو محدود رکھنا پڑےگا۔
