SAHAR

سابق افغان صدر حامد کرزئی نے اپنے ایک ٹوئیٹ میں کہا ہے کہ افغانستان میں جنگی جرائم کا ارتکاب کرنے والے امریکی فوجیوں کو معاف کرنے کا امریکی صدر ٹرمپ کا فیصلہ، افغانوں کی زندگی اور عزت نفس کی مکمل توہین ہے۔

امریکی صدر ڈونلڈ ٹرمپ نے جمعے کو اپنے اختیارات کا استعمال کرتے ہوئے قتل اور جنگی جرائم کے الزام میں قید چند سابق امریکی فوجیوں کی سزا کو معاف کردیا۔

امریکی فوج کے فرسٹ لیفٹیننٹ دہشتگرد کلنٹ لورینس نے دوہزار بارہ میں افغانستان میں تین غیر مسلح افغان شہریوں پر فائرنگ کا حکم دیا تھا جس کے نتیجے میں دو شہری ہلاک ہو گئے تھے۔اس جرم میں اسے انیس سال کی سزا دی گئی تھی جس میں سے وہ چھے سال کی سزا کاٹ چکا تھا۔

اسی طرح امریکی فوج کے اعلیٰ سطح کے سابق رکن اور ویسٹ پوائنٹ کے گریجویٹ میٹ گولسٹین کے لیے بھی ٹرمپ نے معافی کا اعلان کر دیا ہے جس پر آئندہ مہنے مقدمہ چلنے والا تھا۔

قابل ذکر ہے کہ ڈونلڈ ٹرمپ اس سے قبل بھی متعدد امریکی فوجیوں کو بھی ان کی سزا کی مدت پوری ہونے سے پہلے معاف کر چکے ہیں جن پر افغان شہریوں کے قتل عام کا الزام تھا۔