SAHAR

شرمناک امریکی صیہونی سینچری ڈیل منصوبے کے خلاف احتجاج اور مخالفتوں کا سلسلہ جاری ہے اس درمیان فلسطینی انتظامیہ کے سربراہ محمود عباس نے اقوام متحدہ کی سلامتی کونسل کے اجلاس میں سینچری ڈیل منصوبے کو نسل پرستانہ قراردیتے ہوئے اس کو مسترد کردیا ہے

فلسطینی انتظامیہ کے سربراہ محمود عباس نے منگل اور بدھ کی درمیانی رات اقوام متحدہ کی سلامتی کونسل کے اجلاس میں اپنے خطاب میں کہا کہ امریکی منصوبہ سینچری ڈیل نسل پرستی کو مستحکم بنائےگا -

فلسطین سے متعلق ہونے والے سلامتی کونسل کے اجلاس میں محمود عباس نے کہا کہ امریکا کی طرف سے سینچردی ڈیل منصوبہ مسئلہ فلسطین کو پوری طرح سے عالمی منظر نامے سے ختم کرنے کے لئے پیش کیا گیا ہے انہوں نے کہا کہ فلسطینی عوام اس منصوبے کا ڈٹ کر مقابلہ کریں گے - فلسطین سے متعلق سلامتی کونسل کا یہ اجلاس امریکا کے کہنے پر بلایا گیا تھا -

امریکی صدر ٹرمپ نے اٹھائیس جنوری کو صیہونی حکومت کے وزیراعظم بنیامین نتنیاہو کے ساتھ وائٹ ہاؤس میں سینچری ڈیل منصوبے کی رونمائی کی تھی - امریکا نے سینچری ڈیل منصوبہ علاقے کے بعض عرب ملکوں منجملہ سعودی حکومت کے مشورے سے تیار کیا ہے اور اس منصوبے میں فلسطینیوں کے حقوق کو ختم کرنے کی بات کی گئی ہے -

اس منصوبے کے تحت بیت المقدس صیہونی حکومت کے حوالے کردیا جائے گا اور بیرون ملک پناہ لئے ہوئے ساٹھ لاکھ سے زائد فلسطینیوں کو اپنے وطن واپس لوٹنے کا حق نہیں ہوگا اور غرب اردن وغزہ کے بہت ہی محدود علاقے پر ہی فلسطینیوں کا کنٹرول ہوگا -

امریکا کے اس شرمناک منصوبے کی سبھی فلسطینی گروہوں نے بھرپور مخالفت کا اعلان کرتے ہوئے کہا ہے کہ وہ کسی بھی قیمت پر اس منصوبے کو نافذ نہیں ہونے دیں گے جبکہ عالمی سطح پر بھی بہت سے ملکوں حتی امریکا کے اتحادی یورپی ملکوں نے بھی سینچری ڈیل منصوبے کی مخالفت کی ہے -

اس درمیان غرب اردن میں فلسطینی باشندوں نے ایک بڑا مظاہرہ کرکے سینچری ڈیل منصوبے کی مذمت کی ہے ۔ غرب اردن کے شہر رام اللہ میں ہزاروں فلسطینیوں نے المنارہ اسکوائر پر اجتماع کرکے سینچری ڈیل کو پوری قوت کے ساتھ مسترد کردیا -

فلسطینی انتظامیہ کے وزیراعظم محمد اشتیہ نے مظاہرے میں خطاب کے دوران کہا کہ فلسطینی انتظامیہ فلسطینی عوام کے حقوق اور امنگوں کی محافظ ہے -

دوسری جانب لندن میں بھی انسانی حقوق کے کارکنوں کے ایک اجلاس میں امریکی صیہونی منصوبے سینیچری ڈیل کی مذمت کی گئی - لندن میں برطانوی سیاستدانوں اور انسانی حقوق کے کارکنوں کے ایک اجلاس میں فلسطین کے خلاف ٹرمپ کے شرمناک منصوبے کی مذمت کی گئی -

اس اجلاس میں برطانیہ میں فلسطینی انتظامیہ کے نمائندے حسام زملط نے کہا کہ ٹرمپ کا یہ منصوبہ ایک ایسی ٹیم نے تیار کیا ہے جو براہ راست طور پر تل ابیب کے ساتھ کام کرتی ہے اور اس منصوبے کا مقصد اسرائیل نام کی ایک اپارتھائیڈ حکومت کو تشکیل دینا ہے - انہوں نے کہا کہ ٹرمپ کا منصوبہ فلسطینیوں کو ان گھروں میں محصور کردینے والا ہے لیکن فلسطینی اپنی سرزمین کو آزاد کرانے کے لئے جنگ کریں گے -