SAHAR

نیٹو نے اعلان کیا ہے کہ اگر طالبان نے افغانستان پر قبضہ کرلیا تو ان کی حکومت کو سرکاری طور پر تسلیم نہیں کیا جائے گا۔

اناتولی نیوز ایجنسی کے مطابق نیٹو کے سیکریٹری جنرل، ینس اسٹولٹنبرگ نے افغانستان کی صورتحال کے بارے میں تنظیم کی میٹنگ کے بعد کہا کہ یہ فوجی تنظیم افغان حکومت کی ہر ممکن مدد کرے گی تاہم نیٹو کے اہلکاروں کی زندگی زیادہ اہمیت رکھتی ہے۔

اسٹولٹنبرگ نے کہا کہ نیٹو کو افغانستان میں طالبان کے تشدد اور انسانی حقوق کی خلاف ورزیوں پر سخت تشویش ہے۔

نیٹو کے سیکریٹری جنرل نے کہا کہ طالبان کو یہ بات سمجھ لینی چاہئے کہ اگر انھوں نے طاقت کے ذریعے افغانستان پر اپنا تسلط جمایا تو عالمی برادری ان کی حکومت کو تسلیم نہیں کرے گی۔ انھوں نے اسی کے ساتھ افغان تنازعے کے سیاسی حل کی حمایت کا اعلان کیا۔