تاجیکستان، گارڈ آف آنر کے معائنے کے موقع پر صدر ایران نے بعدِ حمد و درود، سلام کیا۔ ویڈیو
صدر ایران سید ابراہیم رئیسی نے تاجیکستان میں ہوئے اکیسویں شانگھائی تعاون تنظیم کے سربراہی اجلاس کے بعد اپنے تاجیک ہم منصب سے ملاقات کی۔ اس موقع پر انہوں نے ایک منفرد اتفاق رقم کیا۔
شانگھائی تعاون تنظیم کے سربراہی اجلاس میں شرکت کے مقصد سے تاجیکستان کے دارالحکومت دوشنبہ میں موجود صدر ایران سید ابراہیم رئیسی نے آج اپنے تاجیک ہم منصب امامعلی رحمان اف سے ملاقات کی۔ اس ملاقات سے قبل تاجک صدر نے ان کا باضابطہ استقبال کیا اور اسکے بعد صدر ایران نے اپنے تاجک ہم منصب کے ساتھ گارڈ آف آنر کا بھی معائنہ کیا۔ معائنے کے دوران سید ابراہیم رئیسی نے حمد و ثنائے الٰہی اور محمد و آل محمد پر سلام و درون نثار کرنے کے بعد گارڈ آف آنر کے دستے کو سلام کیا۔ شاید اس اتفاق کو اپنی نوعیت کا ایک نادر اتفاق کہا جا سکتا ہے۔
خیال رہے کہ صدر ایران سید ابراہیم رئیسی کو گزشتہ روز تاجیکستان کی قومی یونیورسٹی کی جانب سے ڈاکٹریٹ کی اعزازی سند سے بھی نوازا گیا تھا تاہم انہوں نے یہ اعزازی سند حاصل کرنے کے بعد تاجیکستان کی محبتوں کا شکریہ ادا کرتے ہوئے یہ کہا تھا میرے لئے اپنے اُسی معمولی عنوان کو ترجیح حاصل ہے کہ میں حوزہ علمیہ کا ایک ادنیٰ سا طالبعلم ہوں۔
