SAHAR

غرب اردن کے شہر رام اللہ کے شمال مشرقی علاقے میں غاصب صیہونی حکومت کے فوجیوں کی فائرنگ میں ایک فلسطینی لڑکا شہید ہو گیا۔

فلسطینی ذرائع کی رپورٹ کے مطابق غاصب صیہونی فوجیوں نے سولہ سالہ فلسطینی لڑکے امجد ابو علیا کو رام اللہ کے قصبے المغیر میں فائرنگ کا نشانہ بنایا۔ اس موقع پر فلسطینیوں اور صیہونی فوجیوں کے درمیان ہونے والی جھڑپوں میں دسیوں فلسطینی زخمی بھی ہوئے ہیں۔

فلسطینی ذرائع کا کہنا ہے کہ صیہونی فوجی المغیر پر حملہ کرنے والے تھے جس کی اطلاع فلسطینیوں کو مل گئی اور وہ دفاع کے لئے جمع ہو گئے جس کے بعد جھڑپ شروع ہو گئی اور صیہونی فوجیوں نے فائرنگ کر دی۔

حال ہی میں ایک فلسطینی مرکز نے اپنی رپورٹ میں اعلان کیا ہے کہ رواں عیسوی سال کے آغاز سے بارہ جون تک غرب اردن کے شہر جنین میں صیہونی فوجیوں کی جارحیت میں تئیس فلسطینی شہید ہوچکے ہیں۔