غزہ کے شہداء کی تعداد سات ہزار تین سو چھبیس ہوگئی: فلسطینی وزارت صحت
فلسطین کی وزارت صحت نے تازہ ترین اعدادوشمار میں شہدائے غزہ کی تعداد سات ہزار تین سو چھبیس بتائی ہے۔
سحرنیوز/ عالم اسلام : فلسطین کی وزارت صحت نے اعلان کیا ہے کہ غزہ پر غاصب صیہونی حکومت کی بمباریوں میں شہید ہونے والوں کی تعداد سات ہزار تین سو چھبیس ہوچکی ہے جن میں تین ہزار اڑتیس بچے ایک ہزارسات سو چھبیس خواتین ہیں اور چارسو چودہ سن رسیدہ افراد ہیں ۔ فلسطین کی وزارت صحت کے مطابق غزہ پر غاصب صیہونی حکومت کے وحشیانہ فضائي حملوں میں زخمی ہونے والوں کی تعداد تقریبا انیس ہزار ہوگئی ہے۔
یاد رہے کہ فلسطین کے استقامتی محاذ نےسات اکتوبر کو آپریشن طوفان الاقصی شروع کیا جس میں تل ابیب اور دیگر مقبوضہ علاقوں میں غاصب صیہونی حکومت کے فوجی مراکز اور دیگر اسٹریٹیجک تنصیبات کو نشانہ بنایا گیا۔ آپریشن طوفان الاقصی میں غاصب صیہونی حکومت کو نا قابل تلافی شکست کا سامنا ہوا جس کا متعدد صیہونی عہدیداروں نے بھی اعتراف کیا ہے۔ صیہونی حکومت استقامتی محاذ سے اپنی شرمناک ناقابل تلافی شکست کا بدلہ مظلوم فلسطینی عوام سے لے رہی ہے اور تسلسل کے ساتھ غزہ کی رہائشی عمارتوں ، اسپتالوں ، عبادتگاہوں اور بے گھر ہونے والے فلسطینیوں کی پناہ گاہوں پر وحشیانہ حملے کررہی ہے۔ مغرب بالخصوص امریکا کے گرین سگنل اور بھر پور حمایت سے مظلوم فلسطینی عوام پر اب تک ہزاروں ٹن بم برسائے جاچکے ہیں جن میں شہید ہونے والوں میں دو تہائي خواتین اور بچے ہیں ۔
