غزہ اور مغربی کنارے کے مختلف علاقوں پر صیہونی فوج کے تازہ حملوں میں کم از کم دس فلسطینی شہید
غزہ پٹی اور مغربی کنارے کے مختلف علاقوں پر صیہونی فوج کے تازہ حملوں میں کم از کم دس فلسطینی شہید ہوگئے ہیں۔
سحرنیوز/ عالم اسلام: فلسطین کی سما خـبر رساں ایجنسی کی رپورٹ کے مطابق صیہونی فوج کے لڑاکا طیاروں نے آج جمعرات کی صبح غزہ شہر میں ایک مکان پر بمباری کی جس کے نتیجے میں ایک بچے سمیت تین افراد شہید ہوگئے۔ اس حملے میں متعدد افراد زخمی بھی ہوئے ہیں۔
رفح شہر پر بھی صیہونی حکومت کے لڑاکا طیاروں کی بمباری میں چار فلسطینی شہید ہوئے ہیں۔ جبالیہ کیمپ پر بھی صیہونی حکومت کے لڑاکا طیاروں نے بمباری کی ہے لیکن ابھی تک اس حملے میں ہونے والے ممکنہ جانی نقصان کی کوئي رپورٹ موصول نہیں ہوئي ہے۔
آج صبح صیہونی فوجیوں نے مغربی کنارے کے مختلف علاقوں پر حملہ کر دیا جس کے بعد غاصب اسرائیلی فوجیوں اور فلسطینیوں کے درمیان جھڑپیں ہوئيں ان جھڑپوں میں تین فلسطینی شہید ہوگئے۔
