غزہ میں ایک اسکول اور فلسطینیوں کے خیموں پر صیہونی حملوں میں 13 شہید
Aug ۲۱, ۲۰۲۴ ۲۱:۳۶ Asia/Tehran
غاصب صیہونی حکومت نے غزہ میں فلسطینی عوام کی نسل کشی جاری رکھتے ہوئے ایک اسکول اور بے گھر ہوجانے والے فلسطینیوں کے چند خیموں پر بمباری کردی
سحرنیوز/عالم اسلام:غزہ میں اسکول اور بے گھر ہونے والے فلسطینیوں کے خیموں پر وحشیانہ بمباری میں کم سے 13 فلسطینی شہید ہوگئے۔
طبی ذرائع کے حوالے رپورٹ میں بتایاگیا ہے کہ غاصب صیہونی حکومت نے مغربی غزہ میں اقوام متحدہ کے امدادی ادارے انروا سے وابستہ صلاح الدین اسکول پر بمباری کردی جس میں کم سے کم پانچ فلسطینی پناہ گزین شہید اور متعدد زخمی ہوگئے۔
اس رپورٹ کے مطابق صیہونی حکومت کے جنگی طیاروں نے اسی طرح جنوبی غزہ کے بنی سہیلا علاقے میں بے گھر ہوجانے والے فلسطینیوں کے خیموں پر بھی بمباری کردی جس میں دو بچے اور پانچ خواتین شہید ہوگئيں۔
