غزہ میں صیہونی فوج کا مرکاوا ٹینک تباہ
حماس کے فوجی بازو القسام بریگیڈ نے شمالی غزہ میں چار اسرائیلی فوجیوں اور ایک مرکاوا ٹینک کو بم حملے کا نشانہ بنایا ہے۔
سحرنیوز/عالم اسلام: حماس کے فوجی بازو القسام بریگیڈ نے ایک بیان میں اعلان کیا ہے کہ اس نے شمالی غزہ کے جبالیا کیمپ کے القصاصیب محلے میں چار اسرائیلی فوجیوں اور ایک مرکاوا ٹینک پر ایک طاقتور بم سے حملہ کیا ہے۔ القسام نے ایک اور بیان میں بتایا ہے کہ اس کے مجاہدین نے پیر کو شمالی غزہ کے جبالیا کیمپ کے مرکز میں الیمن السعید اسپتال کے پاس ایک گھر کے اندر داخل ہو کر جہاں اسرائیلی فوجی موجود تھے، راکٹوں سے حملہ کیا۔ القسام نے بتایا ہے کہ اس حملے میں اس گھر کے اندر موجود سبھی اسرائیلی فوجی ہلاک اور زخمی ہوگئے۔
اسی کے ساتھ جہاد اسلامی فلسطین کے فوجی بازو سرایا القدس نے اعلان کیا ہے کہ اس نے جبالیا کیمپ کے مشرق میں غاصب صیہونی فوج کی ایک بکتر بند گاڑی پر ثاقب بم سے حملہ کیا۔ اسرائیلی فوج نے اعتراف کیا ہے کہ گزشتہ چوبیس گھنٹے میں غزہ اور جنوبی لبنان میں اس کے 19 فوجی زخمی ہوئے ہیں۔
