عراق ؛ اندرونی معاملات میں امریکی صدر کی مداخلت پسندانہ بیان پر شدید رد عمل
عراق کے حکومت قانون اتحاد کے سربراہ نے عراق کے اندرونی معاملات میں امریکی صدر ٹرمپ کے مداخلت پسندانہ بیان پر ردعمل کا اظہار کیا ہے جبکہ اس ملک کی مجلس اعلای اسلامی نے بھی کہا ہے کہ وزیر اعظم کے انتخاب کا معاملہ اندرونی معاملہ ہے اور اسے قانونی طریقہ کار اور عراق کے اعلی ترین مفادات کی بنیاد پر انجام دیا جائے گا۔
سحرنیوز/عالم اسلام: عراق سے موصولہ رپورٹ کے مطابق عراق کے حکومت قانون اتحاد کے سربراہ نوری المالکی نے عراق کے اندرونی معاملات میں امریکہ کی واضح مداخلت پر ردعمل کا اظہار کیا ہے۔
انہوں نے کہا کہ ہم عراق کے اندرونی معاملات میں کھلی امریکی مداخلت کی سخت مخالفت کا اعلان کرتے ہیں اور اسے عراق کی خودمختاری کی خلاف ورزی اور وزیر اعظم کے عہدے کے لیے امیدوار کے انتخاب میں کوآرڈينیشن فریم ورک کے فیصلے کی خلاف ورزی سمجھتے ہیں۔
المالکی نے زور دیا کہ ممالک کے درمیان بات چیت کی زبان ہی باہمی روابط کا واحد سیاسی آپشن ہے، نہ کہ ڈکٹیشن اور دھمکیوں کے ذریعے کسی ملک کے خلاف ہرزہ سرائی کرنا-
ہمیں فالو کریں:
Follow us: Facebook, X, instagram, tiktok whatsapp channel
عراق کی قانون حکومت اتحاد کے سربراہ نے زور دے کر کہا کہ میں قومی ارادے اور رابطہ کاری کے فریم ورک کے فیصلے کا احترام کرتے ہوئے عراقی عوام کے اعلی ترین مفادات کے لئے کام کرتا رہوں گا
عراق کے لیے کوآرڈينیشن فریم ورک کے امیدوار کا یہ موقف نوری المالکی کی وزارت عظمی کے تعلق سے ٹرمپ کے ویٹو کے بیان کے بارے میں ہے
دوسری جانب عراق کے مستقبل کے وزیر اعظم کے انتخاب کے حوالے سے امریکی صدر کے مداخلت پسندانہ بیانات کے بعد اس ملک کی مجلس اعلای اسلامی نے اس بات پر زور دیا کہ وزیر اعظم کے انتخاب کا معاملہ اندرونی معاملہ ہے اور اسے قانونی طریقہ کار اور عراق کے اعلی ترین مفادات کی بنیاد پر انجام دیا جائے گا۔
ہمام حمودی کی سربراہی میں عراقی اسلامی سپریم کونسل نے اعلان کیا ہے کہ وزیر اعظم کا انتخاب ایک مکمل عراق کا قانونی مسئلہ ہے، جو آئین کی دفعات اور سیاسی عمل کے طریقہ کار کے مطابق انجام پاتا ہے، اور اس روش کے ذریعے کہ جس سے قومی سلامتی کے تحفظ اور اس کے اعلی مفادات کی حفاظت کا کام انجام دیا جاتا ہے-
عراق کی مجلس اعلای اسلامی کے ترجمان علی الدفاعی نے ایک بیان میں کہا ہے کہ یہ تنظیم بین الاقوامی برادری کے ساتھ باہمی احترام اور اندرونی معاملات میں عدم مداخلت کی بنیاد پر مثبت اور متوازن روابط قائم کرنے کی خواہشمند ہے-
انہوں نے اس بات پر زور دیا کہ عراق ایک ایسا ملک ہے جس میں مستحکم بنیادوں پر قائم ادارے اپنے بنیادی اور سیاسی مسائل کو آزادانہ قومی عزم و ارادے کے ساتھ اس طریق سے حل کرنے کی صلاحیت رکھتے ہیں جو عراقی عوام کے نمائندوں کے انتخاب کا مظہر ہو-
شیعہ کوآرڈینیشن فریم ورک اتحاد کی قیادت نے بدھ کی شام کو حکومتی اتحاد کے سربراہ اور مستقبل کے عراقی وزیر اعظم کے عہدے کے امیدوار نوری المالکی کے دفتر میں ایک ہنگامی اجلاس کے انعقاد کی خبر دی ہے
نوری المالکی دوہزار چھ سے دوہزار چودہ تک دو مرتبہ عراق کے وزیراعظم رہ چکے ہیں-
