SAHAR

غزہ میں ہزاروں فلسطینی ملازمین نے ہڑتال کی ہے

فلسطین کی معا نیوز ایجنسی کی رپورٹ کےمطابق قومی وفاقی حکومت کی جانب سے غزہ کی تمام وزارتوں اور اداروں کے ملازمین کو تنخواہوں کی عدم ادائیگی کے خلاف احتجاج کرتے ہوئے سرکاری ملازمین نے جمعرات کو ہڑتال کی ہے۔

یہ ہڑتال، غزہ پٹی میں ملازمین کے حقوق کے دفاع کی یونین کی اپیل پر کی گئی ہے۔

اس یونین کے ترجمان "خلیل الزیان" نے کہا کہ غزہ کے ملازمین کو ایک سال تین مہینے سے تنخواہیں نہیں ملی ہیں۔

 خلیل الزیان نے فلسطین کی قومی حکومت سے مطالبہ کیا کہ وہ ملازمین کے حوالے سے اپنی ذمہ داریوں کو پورا کرے۔ انھوں نے فلسطینی گروہوں سے بھی اس بحران کے حل کے لئے حکومت پر دباؤ ڈالنے کا مطالبہ کیا۔

اس سے پہلے بھی غزہ کے فلسطینی ملازمین نے تنخواہیں نہ ملنے پر ہڑتال کی تھی۔ سرکاری ملازمین کی یونین نے فلسطین کی قومی اتحاد کی حکومت کے وزراء کے غزہ پٹی کے دوروں کی مذمت کی اور کہا کہ یہ دورے سرکاری ملازمین کی مشکلات اور مسائل کے حل کے لئے نہیں بلکہ دکھاوے کے ہیں-