سعودی حکومت نے سانحہ منی میں شہید ہونے والے پاکستانیوں کے لواحقین کو معاوضہ نہیں دیا
May ۱۴, ۲۰۱۶ ۲۱:۰۲ Asia/Tehran
پاکستان کی وزارت مذہبی امور کا کہنا ہے کہ سعودی حکومت سانحہ منی میں شہید ہونے والے پاکستانیوں کے اہل خانہ کو معاوضے کی ادائیگی سے گریز کر رہی ہے۔
پاکستان کی وزارت مذہبی امور کے ترجمان نور زمان کے مطابق سعودی حکومت نے نہ تو سانحہ منی میں شہید ہونے والوں کے اہل خانہ کو کوئی رقم ادا کی ہے اور نہ ہی مسجد الحرام میں کرین گرنے کے واقعے میں شہید ہونے والوں کو معاوضہ ادا کیا ہے۔
نور زمان نے ارنا سے بات چیت کرتے ہوئے کہا کہ حکومت پاکستان نے اپنے طور پر سانحہ منی میں شہید ہونے والے پاکستانیوں کے اہل خانہ کو دس دس لاکھ روپے معاوضہ ادا کیا ہے۔ انہوں نے کہا کہ سانحہ منی اور مسجد الحرام میں کرین گرنے کے حادثے میں ایک سو سترہ پاکستان شہید ہوئے تھے جبکہ دو افراد اب بھی لاپتہ ہیں اور ان کے بارے میں کوئی اطلاع نہیں ہے۔
