امریکہ سے دوری روس سے قربتیں، پاکستان کی نئی پالیسی
پاکستان کے آرمی چیف نے کہا ہے کہ پاکستان روس کے ساتھ فوجی روابط بڑھانا چاہتا ہے۔
پاکستانی فوج کے شعبہ تعلقات عامہ آئی ایس پی آر کے مطابق آرمی چیف جنرل قمر جاوید باجوہ سرکاری دورے پر روس پہنچ گئے جہاں کریملن پیلس میں کمانڈر رشین فیڈریشن گراؤنڈ فورسز کرنل جنرل اولج سلیکوف سے ملاقات کی جس میں دونوں ممالک کی مسلح افواج کے درمیان عسکری روابط بڑھانے اور پیشہ وارانہ امور پر تبادلہ خیال کیا گیا۔
اس موقع پر روسی بری فوج کے کمانڈرنے دہشت گردی کے خلاف جنگ میں پاکستانی فوج کی کامیابیوں کوسراہتے ہوئے کہا کہ روس پاکستان کے ساتھ عسکری تعاون بڑھانے کا خواہش مند ہے۔
پاکستان کے آرمی چیف کا کہنا تھا کہ پاکستان بھی روس کے ساتھ فوجی روابط بڑھانے کا خواہش رکھتا ہے، پاکستان خطے کو تنازعات سے پاک کرنے کے لیے اپنے حصے کے کردارسمیت علاقائی روابط کی مضبوطی کےلیے بھی کردارادا کرتا رہے گا۔ ان کا کہنا تھا کہ حالیہ دنوں میں روس نے خطے کی پیچیدہ صورتحال کے حل میں مثبت کردار ادا کیا۔
واضح رہے کہ پاکستان میں دہشتگردوں کے محفوظ ٹھکانوں سے متعلق امریکی صدر ٹرمپ کے بیان اور پاکستان سے ڈومور کے مطالبے کے بعد پاکستان اور امریکہ کے تعلقات انتہائی خراب ہو گئے اور پاکستان نے احتجاج کرتے ہوئے امریکی سفیر کو دفتر خارجہ میں طلب کیا جس کے بعد پاکستان نے امریکہ سے دوری اور روس کے ساتھ اپنے تعلقات کو فروغ دینے کی پالیسی اختیار کی۔
