کراچی میں بم دھماکے کی کوشش ناکام
پاکستان کے سیکورٹی اداروں نے کراچی میں بم دھماکے کے ذریعے دہشت گردی کی کوشش ناکام بنا دی ہے۔
میڈیا رپوٹوں میں بتایا گیا ہے کہ کراچی کے علاقے کلفٹن بلاک دو میں بلاول ہاؤس چورنگی کے قریب واقع چینی ریسٹورنٹ کے باہر کھڑی گاڑی میں نصب بم کو ناکارہ بنا دیا گیا ہے۔
پولیس کا کہنا ہے کہ گاڑی میں ایک کلو سے زائد بارودی مواد نصب کیا گیا تھا تاہم ڈیوائس میں ٹیکنِیکل خرابی آجانے سے دھماکا نہیں ہوا۔
کہا جا رہا ہے کہ چینی عملے کی اس گاڑی پر موٹر سائیکل سواروں نے یہ بم نصب کیا تھا جس کے فورا بعد عملے نے پولیس کو مطلع کیا تھا۔
پولیس کا کہنا ہے کہ ابھی تک بم نصب کرنے والوں کے بارے میں کچھ علم نہیں ہو سکا البتہ اس سلسلے میں تحقیقات جاری ہیں۔
واضح رہے کہ کراچی میں گزشتہ چند ماہ سے پرتشدد واقعات میں اضافہ ہو گیا ہے اور ساتھ ہی فائرنگ اور دستی بم حملوں کے واقعات پیش آرہے ہیں۔
