بانی پاکستان محمد علی جناح کا یوم پیدائش
آج پاکستان بھر میں کرسمس کے ساتھ ہی بانی پاکستان محمد علی جناح کا یوم پیدائش بھی عقیدت و احترام کے ساتھ منایا گیا۔
بانی پاکستان کے یوم پیدائش کی مناسبت سے کراچی میں مزار قائد اعظم پر ایک پر وقار تقریب منعقد ہوئی جس میں صوبہ سندھ کے اعلی حکام اور سیاستدانوں نے شرکت کی۔ اس موقع پر بانی پاکستان محمد علی جناح کے مزار پر گارڈز کی تبدیلی کی تقریب بھی منعقد ہوئی۔
اسی مناسب سے ایک تقریب صوبہ بلوچستان کے علاقے زیارت میں قائد اعظم ریزیڈینسی میں بھی منعقد ہوئی جس میں وزیر اعلی بلوچستان جام کمال خان نے مہمان خصوصی کی حیثیت سے شرکت کی۔ اس تقریب میں صوبائی وزراء اور سیاسی و قبائلی عمائدین نے بھی شرکت کی۔
بانی پاکستان کے یوم ولادت کی مناسبت سے پورے پاکستان میں سرکاری اور غیر سرکاری تقریبات منعقد ہوئیں۔ اسی مناسبت سے صدر پاکستان ڈاکٹر عارف علوی، وزیر اعظم عمران خان، آرمی چیف جنرل قمر جاوید باجوہ، پاکستان کے چاروں صوبوں کے اعلی عہدیداروں اور مختلف سیاسی رہنماؤں نے پیغامات جاری کر کے قائد اعظم کے خوابوں کو شرمندہ تعبیر کرنے کے لئے اپنے عزم کا اعلان کیا۔
