افغانستان میں انسانی بحران کے بارے میں پاکستانی وزیر اعظم کا انتباہ
پاکستان کے وزیراعظم عمران خان نے افغانستان میں حالات مزید خراب ہونے کے بارے میں خبردار کیا ہے اور کہا ہے پاکستان اکیلے افغانستان کی نئی حکومت کو تسلیم نہیں کرے گا۔
پاکستان کے وزیراعظم عمران خان نے ایک بیان میں زور دے کر کہا کہ اگر عالمی برادری افغانستان کی بدلتی ہوئی صورت حال پر توجہ نہیں دے گی تو انسانی بحران اور خانہ جنگی شروع ہونے کا امکان پایا جاتاہے۔
پاکستان کے وزیراعظم نے انتباہ دیا کہ غیرمستحکم افغانستان دہشتگردوں کے لئے آئیڈیل جگہ اور پورے علاقے اور دنیا خاص طور سے علاقے کے ممالک کے لئے سنگین خطرہ بن جائے گا۔ عمران خان نے کہا کہ پاکستان اکیلے افغانستان کی نئی حکومت کو تسلیم کرنے کا فیصلہ نہیں کرے گا بلکہ جامع حکومت کی تشکیل کے بعد افغانستان کی حکومت کو تسلیم کرے گا۔
عمران خان نے یہ بھی کہا کہ افغان حکومت کو تسلیم کرنے سے پہلے طالبان کو انسانی حقوق کا تحفظ یقینی بنانا ہوگا۔ پاکستانی وزیراعظم نے کہا کہ افغانستان میں خواتین کو تعلیم حاصل کرنے سے روکنا غیر اسلامی ہوگا - انہوں نے کہا کہ افغانستان کو دہشت گردوں کی پناہ گاہ نہیں بننا چاہئے جو پاکستان کے لئے بھی خطرہ بن سکتےہیں - البتہ انہوں نے ایک بار پھر عالمی برادری سے کہا کہ وہ طالبان کو موقع دیں اور ان سے متعلق کچھ کہنا قبل از وقت ہوگا۔
