خوشاب اورگھوٹکی میں دوبارہ پولنگ
Feb ۱۵, ۲۰۲۴ ۱۰:۱۴ Asia/Tehran
پاکستان میں عام انتخابات کے بعد خوشاب، گھوٹکی اور کوہاٹ کے چند پولنگ اسٹیشنز پرآج دوبارہ پولنگ ہو رہی ہے۔
سحرنیوز/پاکستان: الیکشن کمیشن کے مطابق مختلف وجوہات کی بنا پر مؤخر کی گئی پولنگ آج صبح 8 بجے سے شام پانچ بجے تک بغیر کسی وقفے کے جاری رہے گی اور ووٹر اپنا حق رائے دہی استعمال کریں گے۔
یاد رہے کہ این اے 88 خوشاب کے 26 پولنگ اسٹیشنز، پی کے 90 کوہاٹ کے 8 اور پی ایس 18 گھوٹکی کے دو پولنگ اسٹیشنز پر بدامنی کے واقعات پیش آئے تھے۔ بدامنی کے واقعات کے بعد الیکشن کمیشن کی جانب سے مذکورہ پولنگ اسٹیشنز پر پولنگ کا عمل ملتوی کردیا گیا تھا جہاں آج جمعرات کو دوبارہ پولنگ ہو رہی ہے۔
دوسری جانب ٹانک کم ڈیرہ اسماعیل خان میں قومی اسمبلی کے حلقہ این اے 43 کے 6 پولنگ اسٹیشنز پر ووٹ کاسٹ نہ ہونے کی شکایت پر اتوار کو دوبارہ پولنگ ہوگی۔
