پاکستان کی اسلحہ نمائش میں ایران کی شرکت
ایران کا اعلیٰ سطحی فوجی وفد "آئیڈیاز 2024" نامی پاکستان کی بین الاقوامی ہتھیاروں کی نمائش کا دورہ کرنے، سیکورٹی ڈیفنس کانفرنسوں میں شرکت اور ملک کے فوجی حکام کے ساتھ تبادلہ خیال کے لیے کراچی پہنچ گیا، کل سے شروع ہونے والی اس نمائش میں ایران نے اپنی عسکری اور دفاعی مصنوعات کے ساتھ پہلی بار شرکت کی ہے۔
سحرنیوز/پاکستان: ہمارے نمائندے کی رپورٹ کے مطابق پاکستان کے سب سے بڑے شہر کراچی میں ہونے والی دفاعی نمائش آئیڈیاز 2024 میں شرکت کے لئے اعلی ایرانی دفاعی وفد بریگیڈئیر جنرل مجتبی رمضان زادہ کی قیادت میں کراچی پہنچ گیا ہے۔ کراچی ائیرپورٹ پہنچنے پر پاکستانی اعلی حکام اور کراچی میں ایران کے دفاعی اتاشی کرنل محمد محسن شہابی نے ایرانی وفد کا استقبال کیا۔
ایرانی وفد بارہویں بین الاقوامی دفاعی نمائش آئیڈیاز 2024 میں شرکت کرے گا۔ آئیڈیاز 2024 پاکستان کی دفاعی صنعت اور برامدات کو فروغ دینے کے لئے منعقد کی جارہی ہے جس میں متعدد ممالک کے نمائندے شرکت کررہے ہیں۔ نمائش کے افتتاح کے موقع پر پاکستانی وزیراعظم شہباز شریف مہمان خصوصی ہوں گے جبکہ دنیا کے 55 ممالک کے اعلی وفود بھی اس موقع پر موجود ہوں گے۔
