پاکستان اور افغانستان کے درمیان جنگ بندی، ایک دوسرے کی سرزمین کے احترام پر اتفاق
پاکستانی وزیر دفاع خواجہ آصف نے تصدیق کی ہے کہ دونوں ہمسایہ ممالک نہ صرف جنگ بندی پر راضی ہوئے ہیں بلکہ ایک دوسرے کی سرزمین کے احترام کا بھی عزم کیا ہے۔
سحرنیوز/پاکستان: پاکستان کے وزیر دفاع خواجہ آصف نے پاکستان اور افغانستان کے درمیان جنگ بندی معاہدے کی تصدیق کرتے ہوئے کہا ہے کہ دونوں ہمسایہ ممالک ایک دوسرے کی سرزمین کا احترام کریں گے۔
قطری وزارت خارجہ نے اعلان کیا تھا کہ پاکستان اور افغانستان جنگ بندی پر راضی ہوگئے ہیں۔ اس جنگ بندی کا فیصلہ دوحہ میں ہونے والے مذاکرات کے دوران ہوا۔
قطری وزارت خارجہ کی جانب سے جاری بیان میں کہا گیا کہ پاکستان اور افغانستان کے درمیان جنگ بندی پر اتفاق قطر و ترکیے کی ثالثی میں ہوا۔ دونوں ممالک نے آئندہ چند دنوں میں مزید ملاقاتیں کرنے اور دونوں ممالک کے درمیان امن اور استحکام کے لیے مستقل مکینزم بنانے پر بھی اتفاق کیا ہے۔
بعد ازاں پاکستانی وزیر دفاع اور قطر میں ہونے والے مذاکرات کے لئے پاکستانی وفد کے سربراہ خواجہ آصف نے ایکس پر اپنے بیان میں تصدیق کی کہ پاکستان اور افغانستان کے مابین جنگ بند معاہدہ طے پاگیا ہے۔
